خامشی اچھی نہیں انکار ہونا چاہئے یہ تماشا اب سر بازار ہونا چاہئے خواب کی تعبیر پر اصرار ہے جن کو ابھی پہلے ان کو خواب سے بیدار ہونا چاہئے ڈوب کر مرنا بھی اسلوب محبت ہو تو ہو وہ جو دریا ہے تو اس کو پار ہونا چاہئے اب وہی کرنے لگے دیدار سے آگے کی بات جو کبھی کہتے تھے بس دیدار ہونا چاہئے بات پوری ہے ادھوری چاہئے اے جان جاں کام آساں ہے اسے دشوار ہونا چاہئے دوستی کے نام پر کیجے نہ کیونکر دشمنی کچھ نہ کچھ آخر طریق کار ہونا چاہئے جھوٹ بولا ہے تو قائم بھی رہو اس پر ظفرؔ آدمی کو صاحب کردار ہونا چاہئے
یہ ہمارا خاصہ ہے درد بے تحاشہ ہے زندگی کا پوچھا ہے اک عجب تماشہ ہے یاد اس کی آنے سے دل کو بھی دلاسہ ہے تو غریب لوگوں کا قیمتی اثاثہ ہے تیرے پاس چوکھٹ ہے میرے پاس کاسہ ہے تجھ کو بھول سکتا ہوں تو تو اک شناسا ہے
