حدیث ۴۵
امام احمد و نسائی و ابن ماجہ و حاکم نے اسامہ بن شریک رضی اللّٰہ تعالٰی عنہ سے روایت کی، کہ رسول ﷲ صلَّی اللّٰہ تعالٰی علیہ وسلَّم نے فرمایا: ’’اے اﷲ کے بندو! ﷲ (عزوجل) نے حرج اٹھا لیا، مگر جو شخص کسی مرد مسلم کی بطورظلم آبروریزی کرے، وہ حرج میں ہے اور ہلاک ہوا۔‘‘
(’’کنزالعمال‘‘، کتاب الأخلاق، الحدیث:۸۰۱۴، ج۳، ص۲۳۴۔)
بقیہ حدیث44
ارشاد فرمایا: ’’وہ جو تم نے اپنے بھائی کی آبروریزی کی، وہ اس گدھے کے کھانے سے بھی زیادہ سخت ہے۔ قسم ہے اس کی جس کے ہاتھ میں میری جان ہے! وہ (ماعز) اس وقت جنت کی نہروں میں غوطے لگا رہا ہے۔‘‘
(’’سنن أبي داود‘‘، کتاب الحدود، باب رجم ما عزبن مالک، الحدیث:۴۴۲۸، ج۴، ص۱۹۷۔)
حدیث ۴۴
ابو داود نے ابوہریرہ رضی اللّٰہ تعالٰی عنہ سے روایت کی، کہ ماعزاسلمی رضی اللّٰہ تعالٰی عنہ کو جب رجم کیا گیا تھا، دو شخص آپس میں باتیں کرنے لگے، ایک نے دوسرے سے کہا، اسے تو دیکھو کہ ﷲ (عزوجل) نے اس کی پردہ پوشی کی تھی مگر اس کے نفس نے نہ چھوڑا، کتے کی طرح رجم کیا گیا۔ حضور (صلَّی اللّٰہ تعالٰی علیہ واٰلہٖ وسلَّم) نے سن کر سکوت فرمایا۔ کچھ دیر تک چلتے رہے، راستہ میں مرا ہوا گدھا ملا جو پاؤں پھیلائے ہوئے تھا۔ حضور (صلَّی اللّٰہ تعالٰی علیہ واٰلہٖ وسلَّم) نے ان دونوں شخصوں سے فرمایا: جاؤ اس مردار گدھے کا گوشت کھاؤ۔ انھوں نے عرض کی، یا نبی اﷲ(صلَّی اللّٰہ تعالٰی علیہ واٰلہٖ وسلَّم)! اسے کون کھائے گا؟ ارشاد فرمایا: ’’وہ جو تم نے اپنے بھائی کی آبروریزی کی، وہ اس گدھے کے کھانے سے بھی زیادہ سخت ہے۔ (بقیہ آگے)
حدیث ۴۳
بیہقی نے دعوات کبیر میں انس رضی اللّٰہ تعالٰی عنہ سے روایت کی، کہ رسول ﷲ صلَّی اللّٰہ تعالٰی علیہ وسلَّم نے فرمایا کہ غیبت کے کفار ہ میں یہ ہے کہ جس کی غیبت کی ہے، اس کے لیے استغفار کرے، یہ کہے۔ اَللّٰھُمَّ اغْفِرْلَـنَا وَلَـہ۔
(’’مشکاۃ المصابیح‘‘، کتاب الآداب، باب حفظ اللسان۔۔۔إلخ، الحدیث:۴۸۷۷، ج۳، ص۴۷۔) ’’الٰہی! ہمیں اور اسے بخش دے۔‘‘
زبان کی آفات کے بارے مزید احادیث
حدیث ۴۲
بیہقی نے شعب الایمان میں ابوسعید و جابر رضی اللّٰہ تعالٰی عنہما سے روایت کی، کہ رسول اﷲ صلَّی اللّٰہ تعالٰی علیہ وسلَّم نے فرمایا: غیبت زنا سے بھی زیادہ سخت چیز ہے۔ لوگوں نے عرض کی، یارسول ﷲ! (صلَّی اللّٰہ تعالٰی علیہ واٰلہٖ وسلَّم) زنا سے زیادہ سخت غیبت کیونکر ہے۔ فرمایا کہ ’’مرد زنا کرتا ہے پھر توبہ کرتا ہے، اﷲتعالیٰ اس کی توبہ قبو ل فرماتاہے اور غیبت کرنے والے کی مغفرت نہ ہوگی، جب تک وہ نہ معاف کردے جس کی غیبت ہے۔‘‘
(’’شعب الإیمان‘‘، باب في تحریم إعراض الناس، الحدیث:۶۷۴۱، ج۵، ص۳۰۶۔) اور انس رضی اللّٰہ تعالٰی عنہکی روایت میں ہے کہ ’’زنا کرنے والا توبہ کرتا ہے اور غیبت کرنے والے کی توبہ نہیں ہے۔‘‘( المرجع السابق، الحدیث:۶۷۴۲، ج۵، ص۳۰۶۔)
حدیث ۴۱
ترمذی نے حضرت عائشہ رضی اللّٰہ تعالٰی عنہا سے روایت کی، کہ رسول اﷲ صلَّی اللّٰہ تعالٰی علیہ وسلَّم نے فرمایا’’میں اس کو پسند نہیں کرتا کہ کسی کی نقل
کروں ، اگرچہ میرے لیے اتنا اتنا ہو۔‘‘ (’’سنن الترمذي‘‘، کتاب صفۃ القیامۃ۔۔۔
إلخ، باب:۱۱۶، الحدیث: ۲۵۱۰، ج۴، ص۲۲۵۔) یعنی نقل کرنا دنیا کی کسی چیز کے مقابل میں درست نہیں ہوسکتا۔
حدیث ۴۰
بیہقی نے ابن عباس رضی اللّٰہ تعالٰی عنہما سے روایت کی، دو شخصوں نے ظہر یا عصر کی نماز پڑھی اور وہ دونوں روزہ دار تھے، جب نماز پڑھ چکے نبی کریم صلَّی اللّٰہ تعالٰی علیہ وسلَّم نے فرمایا: تم دونوں وضو کرواور نماز کا اعادہ کرو اور روزہ پورا کرو اور دوسرے دن اس روزہ کی قضا کرنا۔ انھوں نے عرض کی، یارسول اللّٰہ صلَّی اللّٰہ تعالٰی علیہ وسلَّم ! یہ حکم کس لیے؟ ارشاد فرمایا: ’’تم نے فلاں شخص کی غیبت کی ہے۔‘‘
(’’شعب الإیمان‘‘، باب في تحریم اعراض الناس، الحدیث:۶۷۲۹، ج۵، ص۳۰۳۔ )
حدیث ۳۹
امام احمد وترمذی و ابو داود نے حضرت عائشہ رضی اللّٰہ تعالٰی عنہا سے روایت کی، کہتی ہیں ، میں نے نبی کریم صلَّی اللّٰہ تعالٰی علیہ وسلَّم سے کہا، صفیہ رضی اللّٰہ تعالٰی عنہا کے لیے یہ کافی ہے کہ وہ ایسی ہیں ایسی ہیں یعنی پستہ قد ہیں ، حضور (صلَّی اللّٰہ تعالٰی علیہ واٰلہٖ وسلَّم) نے ارشاد فرمایاکہ ’’تم نے ایسا کلمہ کہا کہ اگر سمندر میں ملایا جائے تواس پر غالب آجائے۔
‘‘ (’’سنن أبي داود‘‘، کتاب الأدب، باب في الغیبۃ، الحدیث:۴۸۷۵، ج۴، ص۳۵۳۔) یعنی کسی پستہ قد کو ناٹا، ٹھگنا کہنا بھی غیبت میں داخل ہے، جبکہ بلاضرورت ہو۔
حدیث ۳۸
صحیح مسلم میں ابوہریرہ رضی اللّٰہ تعالٰی عنہ سے مروی، کہ رسول اللّٰہ صلَّی اللّٰہ تعالٰی علیہ وسلَّم نے فرمایا: تمھیں معلوم ہے غیبت کیا ہے؟ لوگوں نے عرض کی، اللّٰہ و رسول (عزوجل وصلَّی اللّٰہ تعالٰی علیہ واٰلہٖ وسلَّم) خوب جانتے ہیں ۔ ارشادفرمایا:غیبت یہ ہے کہ تو اپنے بھائی کا اس چیز کے ساتھ ذکر کرے جو اسے بری لگے۔ کسی نے عرض کی، اگر میرے بھائی میں وہ موجود ہو جو میں کہتا ہوں (جب تو غیبت نہیں ہوگی)۔ فرمایا: ’’جو کچھ تم کہتے ہو، اگر اس میں موجود ہے جب ہی تو غیبت ہے اور جب تم ایسی بات کہو جو اس میں ہو نہیں ، یہ بہتان ہے۔‘‘ (’’صحیح مسلم ‘‘، کتاب البروالصلۃ۔۔۔إلخ، باب تحریم الغیبۃ، الحدیث:۷۰۔(۲۵۸۹)، ص۱۳۹۷۔)
حدیث ۳۷: بیہقی نے شعب الایمان میں عبدالرحمن بن غنم و اسما بنتِ یزید رضی اللّٰہ تعالٰی عنہماسے روایت کی کہ نبی کریم صلَّی اللّٰہ تعالٰی علیہ وسلَّم نے فرمایا کہ ’’ﷲ (عزوجل) کے نیک بندے وہ ہیں کہ ان کے دیکھنے سے خدا یاد آئے اور ﷲ(عزوجل) کے برے بندے وہ ہیں ، جو چغلی کھاتے ہیں ، دوستوں میں جدائی ڈالتے ہیں اور جو شخص جرم سے بری ہے، اس پر تکلیف ڈالنا چاہتے ہیں ۔‘‘
(’’شعب الإیمان‘‘، باب في الاصلاح بین الناس۔۔۔إلخ، الحدیث:۱۱۱۰۸، ج۷، ص۴۹۴۔ و’’مشکاۃ المصابیح‘‘، کتاب الآداب، باب حفظ اللسان۔۔۔إلخ، الحدیث:۴۸۷۱، ج۳، ص۴۶۔ )
حدیث ۳۶
صحیح بخاری و مسلم میں حذیفہ رضی اللّٰہ تعالٰی عنہ سے مروی، کہتے ہیں کہ رسول ﷲ صلَّی اللّٰہ تعالٰی علیہ وسلَّم کو میں نے یہ فرماتے سنا کہ ’’جنت میں چغل خور نہیں جائے گا۔
‘‘ (’’صحیح مسلم‘‘، کتاب الایمان، باب بیان غلظ تحریم النمیمۃ، الحدیث:۱۶۹۔(۱۰۵)، ص۶۷۔)
حدیث ۳۵
دارمی نے عمار بن یاسر رضی اللّٰہ تعالٰی عنہما سے روایت کی، رسول ﷲ صلَّی اللّٰہ تعالٰی علیہ وسلَّم نے فرمایا: ’’جو شخص دنیامیں دورخاہوگا، قیامت کے دن آگ کی زبان اس کے لیے ہوگی۔‘‘ (’’سنن الدارمي‘‘، کتاب الرقائق، باب ما قیل في ذی الوجہین، الحدیث:۲۷۶۴، ج۲، ص۴۰۵۔) ابوداود کی روایت میں ہے کہ ’’اس کے لیے دو زبانیں آگ کی ہو ں گی۔
‘‘ (’’سنن أبي داود‘‘، کتاب الأدب، باب في ذی الوجھین، الحدیث:۴۸۷۳، ج۴، ص۳۵۲۔)
حدیث ۳۴
صحیح بخاری و مسلم میں ابوہریرہ رضی اللّٰہ تعالٰی عنہ سے مروی، کہ رسول ﷲ صلَّی اللّٰہ تعالٰی علیہ وسلَّم نے فرمایا: ’’سب سے زیادہ برا قیامت کے دن اس کو پاؤ گے، جو ذوالوجہین ہو۔
‘‘ (’’صحیح البخاري‘‘، کتاب الأدب، باب ماقیل في ذی الوجھین، الحدیث:۶۰۵۸، ج۴، ص۱۱۵۔)
یعنی دو رخا آدمی کہ ان کے پاس ایک مونھ سے آتا ہے اور ان کے پاس دوسرے مونھ سے آتا ہے یعنی منافقوں کی طرح کہیں کچھ کہتا ہے اور کہیں کچھ کہتا ہے، یہ نہیں کہ ایک طرح کی بات سب جگہ کہے۔
حدیث ۳۳
صحیح مسلم میں ابوہریرہ رضی اللّٰہ تعالٰی عنہ سے مروی، کہ رسول اﷲ صلَّی اللّٰہ تعالٰی علیہ وسلَّم نے فرمایا: ’’جب کوئی شخص یہ کہے کہ سب لوگ ہلاک ہوگئے تو سب سے زیادہ ہلاک ہونے والا یہ ہے۔
‘‘ (’’صحیح مسلم‘‘، کتاب البر والصلۃ۔۔۔إلخ، باب النھی عن قول: ہلک الناس، الحدیث:۱۳۹۔(۲۶۲۳)، ص۱۴۱۲۔) یعنی جو شخص تمام لوگوں کو گنہگار اور مستحق نار بتائے تو سب سے بڑھ کر گنہگار وہ خود ہے۔
حدیث ۳۲
بخاری و مسلم و احمد و ابو داود نے ابوہریرہ رضی اللّٰہ تعالٰی عنہ سے روایت کی، کہ رسول ﷲ صلَّی اللّٰہ تعالٰی علیہ وسلَّم فرماتے ہیں کہ ﷲ تعالیٰ نے فرمایا: ’’ابن آدم مجھے ایذا دیتا ہے کہ دہر کو برا کہتا ہے، دہر تو میں ہوں میرے ہاتھ میں سب کام ہیں ، رات اور دن کو میں بدلتا ہوں ۔
‘‘ (’’صحیح البخاري‘‘، کتاب التوحید، باب قول اللّٰہ تعالٰی { یریدون ان یبدلواکلام اللّٰہ }، الحدیث:۷۴۹۱، ج۴، ص۵۷۲۔) یعنی زمانہ کو برا کہنا ﷲ(عزوجل) کو برا کہنا ہے کہ زمانہ میں جو کچھ ہوتا ہے، وہ سب اﷲتعالیٰ کی طرف سے ہوتا ہے۔
حدیث ۳۱
صحیح بخاری و مسلم میں حضرت عائشہ رضی اللّٰہ تعالٰی عنہا سے مروی، کہ رسول ﷲ صلَّی اللّٰہ تعالٰی علیہ وسلَّم فرماتے ہیں : ’’ﷲ تعالیٰ کے نزدیک قیامت کے دن سب لوگوں میں بدتر مرتبہ اس کا ہے کہ اس کے شر سے بچنے کے لیے لوگوں نے اسے چھوڑ دیا ہو۔
‘‘ (’’صحیح البخاري‘‘، کتاب الأدب، باب لم یکن النبی صلی اللّٰہ علیہ وسلم فاحشا۔۔۔إلخ، الحدیث:۶۰۳۲، ج۴، ص۱۰۸۔) اور ایک روایت میں ہے کہ ’’اُس کے فحش سے بچنے کے لیے چھوڑ دیا ہو۔‘‘(’’صحیح مسلم‘‘، کتاب البر والصلۃ۔۔۔إلخ، باب مداراۃ من یتقی فحشہ، الحدیث:۷۳۔(۲۵۹۱)، ص۱۳۹۷۔)
حدیث ۳۰
امام احمد و ترمذی و ابن ماجہ نے انس رضی اللّٰہ تعالٰی عنہ سے روایت کی، کہ رسول اﷲ صلَّی اللّٰہ تعالٰی علیہ وسلَّم نے فرمایا: ’’فحش جس چیز میں ہوگا، اسے عیب دار کردے گا اور حیا جس میں ہوگی، اسے آراستہ کردے گی۔
‘‘ (’’سنن الترمذي‘‘، کتاب البر والصلۃ، باب ماجاء في الفحش والتفحش، الحدیث:۱۹۸۱، ج۳، ص۳۹۲۔)
حدیث ۲۹
طبرانی نے سمرہ رضی اللّٰہ تعالٰی عنہ سے روایت کی، کہ رسول ﷲ صلَّی اللّٰہ تعالٰی علیہ وسلَّم نے فرمایا: ’’اگر کوئی کسی کو برا بھلا کہنا ہی چاہتا ہے تو نہ اس پر افترا کرے، نہ اس کے والدین کو گالی دے، نہ اس کی قوم کو گالی دے، ہاں اگر اس میں ایسی بات ہے جو اس کے علم میں ہے تو یوں کہے کہ تو بخیل ہے یا تو بزدل ہے یا تو جھوٹا ہے یا بہت سونے والا ہے۔
‘‘ (’’المعجم الکبیر‘‘، الحدیث:۷۰۳۰، ج۷، ص۲۵۳۔)
submitted by
uploaded by
profile:
Sorry! Ap apne item ya profile ko report nahi kar saktey, na hi apne ap ko block kar saktey hain